martes, 16 de diciembre de 2014

LOS NUESOS ÚLTIMOS VERSOS XUNTOS. RÉQUIEM POR MONDO.

Cuando llegasti
hermanu
nun sabía que yeres el mio hermanu
pero tampoco del amor interespecial
nin de lo especial del mesmu
nin de la vida apenes
nin de tantes coses
que cómo saber siendo un neñu ventiañeru
y para qué engañame
sigo ensin tener puta idea
y cuarentón
anque daqué intuyan los versos
que tantes vegaes escribimos xuntos
naquella terraza
d'aquel chigre
d'aquella ciudá
que güei
nos ye alloñada
y ayena
apaecíu tu ve a saber d'ónde
lo que tampoco importa
llegasti hermanu
y agora marches a mexar les estrelles
marches de los nuesos llaos pacientes
que yera esti tiempu la prórroga del partíu de la to vida
que yera esti tiempu la nuesa certidume
de faelo bien contigo
pero marches de los nuesos llaos collacios
collaciu Mondu'l de tantos nomes
marches  de la vida cachorra que nunca quixisti abandonar
marches perru llocu d'esta llocura de mundu humanu
marches  con munches suertes y penes poques
que suerte ye esti dite natural
esti apagase ensin sufrimientu
ensin esparavanes
ensin jeringuillas
nin veterinarios más esmolecíos pol comerciu que por ti
que suerte ye nun conocer la inxusticia más que de pasada
y suerte ye que cuando asina foi tampoco fuisti consciente
que suerte ye vivir ensin conocer les lleis humanes
ensin chips
nin controles
nin vacunes
nin hosties estúpides consagraes
que suerte foi abandonar la ciudá de tolos tos enemigos muertos
de murnia y formigón.

Y marches
marchasti ente les mios manos
fai apenes un momentu
ente les mesmes que te dieron tierra
les mesmes nes que quedó la to buelga
y van afalagar la to alcordanza
les qu'escriben estos últimos versos xuntos:

que la tierra te sía leve
collaciu...

No hay comentarios:

Publicar un comentario