viernes, 12 de diciembre de 2014

EL TREN Y LA NUECHE, LA MAXIA Y LOS SUAÑOS

El tren y la nueche
la maxia y los suaños
que bien podría tar al salir de cada estación
que bien podría ser al dir escontra l'escuridá
cualquier rincón del mundu
que bien podría si miro pa fuera
tar nel metro de Nueva York
camino del CBG añu 86
y los Bad Brains a puntu de descargar tola so enerxía
y nun saliendo de Tremañes
cola enerxía diferida al traviés d'unos auriculares
pero tamién en dalgún llugar de Nicaragua
añu de la victoria
escuchando a Cardenal y les sos pallabres
y nun saliendo de Pinzales
y pensando en lleer al llegar a casa los sos Salmos
quiciabes tea agora baltáu en dalgún monte solitariu contemplando la Vía Láctea en tola so rellumanza
y nun saliendo de Sotiello
pensando si les nubes güei
dexaríen Orión al descubiertu
anque igual falo colos páxaros
en metá d'un monte de carbayos inmensos
y nun sale esti tren de L'Aguda
col so trino metálicu d'aceru
claro que soi un neñu insomne
al que-y dexen navegar pel mar de los sos suaños
hasta llegar al puertu de toles posibilidaes
que nunca naide s'atrevió a tullir
y nun salgo de Puente Buracos
escontra otru rincón de la escuridá
pero avanza'l tren
y escucho rises y bullicio
celebramos con dances la bayura de la collecha
toos los humanos del planeta
tolos novios de Lizano
y nun parte máquina nenguna de Florida dirección Noreña
que nos tenemos los unos a lo otros
y naide manda sobre naide
nin hai ciudaes
nin hai países
nin hai El Berrón
nin Xixún
nin Bendición
nin Valdesoto
nin máquines
nin falsu progresu
que vivimos y festexamos
que sufrimos y lloramos
na llibertá de namá ser
una parte más de lo que nomamos Naturaleza...

pero próxima estación Carbayín
y regresu a la realidá
a la casa
a la collacia
lo que nun ye pocu
y m'enllena
anque'l tren y la nueche
anque la maxia y los suaños.

No hay comentarios:

Publicar un comentario