lunes, 10 de noviembre de 2014

RUIU Y DISTORSIÓN

Y yá nun yes un neñu
pero yes un neñu colos güeyos recién abiertos
atrás queda queda la ceguera adolescente
y más allá les visiones infantiles

¿por qué nun recordamos cuándo entamaron a tullinos la fantasía?

too ye distorsión na alcordanza
ruiu indescifrable

que inventamos un pasáu en cada recreación del pasáu
recreaciones de recreaciones del poema propiu
o ayenu
de suru qu'el que solo nós somos a escribir

¿qué asocedió?

el mio yo apenes despiertu de va dieciséis años nun sabría dicir
diría la so recreación
güei
equí
agora
camudóme la vida
que quedé esteláu por ella
dende aquella primera visión
que tampoco yera la primera
y ella ye
güei
equí
agora
la mio collacia

y un neñu subióse sobre los mios costazos
y esi neñu ye
güei
equí
agora
un home
aunque miento
una persona pola que'l tiempu pasa
aunque miento
nun pasa'l tiempu
percuerre él el tiempu
atrápalo
y regálalo
tresformáu n'amor
con toles minúscules
y cada minúscula un infinitu

infinitu
que si bien llindamos la nuesa consciencia
la nuesa inconsciencia nun tien fin nin llende
nin se-y espera

y volvióme a camudar la vida
quedé esteláu por él
dende esa primera tarde
que tampoco yera la primera....

entames entós aprender
que cada decisión implica un sacrificiu
que nun hai camín llimpiu na vida de los comunes

entamar aprender a aprender
a ser consciente de los aprendixajes
(lo que non necesariamente implica consecuencia
esi ye un camín más llargu
ensin fin diría
si nun fuera dicir enforma)

pero retomo onde dixi sacrificiu
y tresfórmase'n pagu
que nun hai mayor beneficio qu'aquel non cuantificable
non acumulable
que vivimos nel güei
y ye'l güei la vida en tola so orixinalidá
en tola so exclusividad espansiva del sentimientu propiu
que siempre ye plural
narrable
incalculable
inmaterial
infinitu
invencible....

aunque alcuérdome agora que yera'l mio yo de va dieciséis años el que diba falar
y callé-y
yera ruiu
yera distorsión....

pero ella estelóme dende esa primera visión
que tampoco yera la primera
pero él estelóme dende esa primera tarde
que tampoco yera la primera

y nin miento
nin ruiu
nin distorsión.

No hay comentarios:

Publicar un comentario