viernes, 21 de noviembre de 2014

QUICIABES Y LA ESTRAÑA SENSACIÓN

Llevo unos díes con una sensación estraña

nun tengo bien claro nin como nomala
nin como la voi poetizar

supongo que d'una forma directa
según siempre tratu...

siempre
¿siempre?
¡siempre!

esa ye la pallabra que voi xunir
a la sensación.:
sensación de siempre
escribir estos versos nesti tren
ver estes mesmes cares delantre la mía
escuchar con allegría esta próxima estación
llegar nesti coche a esta casa
vivir cola collacia que m'espera cada nueche
saludar a estes estrelles les nueches estenes
afalagar a estos perros y estes gates
dormir nesta cama arrodiada de piedra
espertar con esta ilusión per un nuevu día
activar esti cuerpu de mente perezosa
amar a esta tierra que s'esmuce ente les mios manos
saber escuchar al vientu y a los árboles
falar con esta xente cola que falo
percorrer estos caminos desasfaltados...

o a lo meyor sía nunca la pallabra
que voi haber de xunir:
sensación de nunca vivir onde nací
creer atopar el mio pequenu rincón del mundu
conocer a la xente que conocí
sentime nuna especie de paz
buscar les mios llindes verdaderos
creer con fuerza nel mio mesmu
entender lo que creyí entender
vivir como viví...

anque a lo meyor voi quedame con quiciabes...

y el siempre
y el nunca
se les compongan.

No hay comentarios:

Publicar un comentario