viernes, 28 de noviembre de 2014

GOLOR A LLIMPIU

Atizo'l llar hasta qu'un infiernu de caricotes
trescala con suavidá na madera que nos va calecer
hasta que les manos güelen a fueu y fumu
y piensu en qué feliz me sentiría con esi golor
percorriendo tol mio cuerpu
golor a vida que diz Daniel
como golor a vida ye la tierra siempre húmeda
d'esta tierra que nos acueye
como golor a vida son los nuesos cuerpos sudaos
o en reposu
o en movimientu
o de rutina sedentarios
o trabayaos pola rutina
como golor a vida lleva la perra
la gata'l bilanu
la oveya'l mure'l caballu
como a vida golíen les nueses miraes
enantes de cegales col venenu arumáu
de colonies
cremes
xeles
y demás mierdes que damos en llamar goler a llimpiu

qué babayada llamar suciedá a uno mesmu
a la tierra que te alimenta
al carbón que te calez...

asina que venga:
a duchase enantes de dormir
nun sía que cobren vida los suaños
y nos saquen d'esta muerte del nós
como nós animales

¿animales?
animales renegaos
de la tierra que nos acueye
de los hermanos que nos acompañen nesti viaxe ensin sentíu
y sentíos engañaos
arrinconaos
proscritos
que goler
quiero goler animal
a ti
y al mio mesmu..

pero hosties
quiero
y me traiciono
y me ducho
que tengo que dexar esti poema
y dir a trabayar.

No hay comentarios:

Publicar un comentario