miércoles, 19 de noviembre de 2014

EL MURE LA VIDA Y LA SORPRESA

La vida y los momentos
más o menos duraderos de la vida
nos cóyen siempre por sorpresa

o nun ye sorpresa la vida propia
esa que de secute atopamos
cuando neños pensamos
nel qué de too esto
cuando inda somos sabios
primero que sían vultables los primeros efectos
del procesu d'intoxicación cultural

o acasu nun nos sosprienden los momentos
que lleguen de secute y se queden
empeñaos en abrinos a nueves dimensiones
qu'enxamás contempláramos
más qu'en pensamientos pelegrinos
espertándonos a la siempre ilusión
d'una nueva inocencia

como sorpresa ye'l mure que vive na cocina
dientro del falsu tubu del calentador
qu'invariablemente al sentir la esplosión del contactu
baxa y corriquia polos pandos
pasíase a escasos centímetros de ti
mira nerviosu
con interés

como sorpresa ye la reacción de la gata que reposa sobre dalguna siella
tres les sos caceríes nocherniegues:
míralu
bocexa
vuelve dormir..

¿Quién s'empeña en dicir
que nun son posibles
el respetu
y la convivencia?

No hay comentarios:

Publicar un comentario