jueves, 30 de octubre de 2014

TREINTA D'OCHOBRE

Amanez
y el calendariu diz que ye treinta d'Ochobre
y que pasáu mañana va haber quienes procesionen escontra los campusantos
pa recordar a los sos muertos
(lo que nun entendí nunca
aunque respeto
quiciabes porque nun tengo muertos que m'importen
quiciabes porque los que m'importen llévo-yos siempre dientro)

pero amanez
y les muyeres preparen xardineres en mio alredor
corten les margarites
corten los crisantemos
(corten dicen les flores de los muertos
que cuidaron dende'l mes de Febreru)

y yá avanza la mañana
ya intercambien xardineres
y regálense los esquejes
que'l próximu añu van haber de floriar

y yá avanza la mañana
y comenten lo mesmu que'l añu pasáu comentaben
cuando amaneció treinta d'Ochobre
y repitíase'l ritual

y yá morre la mañana
y piensu qu'esto tien que ser la tradición
y entrúgome qué tien que ver col comerciu
y qu'hosties ye eso de jalogüen
que les flores que güei veo compartir
víles ayer na ciudá a munchos euros
que preparen fiestes antroxaes los colexos
y nun ye Antroxu
y métennosla siempre doblada
y los festexos que un día fueron populares
secuestrólos ayer la ilesia
ya impóneslos güei el capital ensin disimulu
y en menada perdemos el culu por mercar
por enllenar el banduyu de los fartones
por suxetanos a feches
que yá nun nos pertenecen
aunque prefiero pesllar estos versos
cola imaxe del amanecer del día que'l calendariu diz treinta d'Ochobre
y el llabor ritual de les mio vecines.

No hay comentarios:

Publicar un comentario