jueves, 23 de octubre de 2014

NUN TUVI PERO TAMIÉN.

A Daniel.

Y viaxé dellos miles de kilómetros
sobre un océanu de foles incontables
y el so llargor
y les sos ondes
y la so vida

viaxé na escuridá por paraxes desconocíos
na ceguera de nun tar ellí
equí
nún tren
dende un tren deteníu pensando nél
y nes idees

?cómo puede quien afirmar que ye d'idees fixes?
?cómo quienes enferronaos a una idea?
inmóvil
la idea a la que s'enferronen
inmóviles
quienes na so visión
?cómo puede quien ensin equívocu
si equívocu ye la grana dea idea que ta por venir
de la mutación de la idea orixinal?
(sía como quier la idea
sía como quier la so orixinalidá)
idea fixa dicimos
inmóvil
inmovilidá
y dicímoslo seres en movimientu
sobre un mundu que nun para
avanzando pola vida
los seres
y el mundu
(sía como quier la vida
sía como quier avanzar
sía como quier l'espaciu
sía como quier el tiempu
movimientu
too movimientu
(sía la curva una recta retorcía
sía más bien la recta una curva torturada)
y el tren fai unos versos deteníu
ye agora'l tren en movimientu
y lo qu'ayer pensaba azul
relluma güei nos mios güeyos verde
y mañana va españar el fríu de los nuesos suaños
pa nun apaecer nunca más

y él atopáu en metá de dalgún llugar
abonándolo cola so enerxía
materializando los sos suaños
y los suaños de quién-y precedieron
aquellos a quienes la causalidá de la vida
y la casualidá de la muerte retuvieron
nel so momentu
(toos son los nuesos momentos)
falo de la to ma
falo del to güelu
d'ella a quien amo
d'él que quixera conocer
d'el que qixeres conocer
d'ella a quien ames

y tú
(él nesti poema)
buscando cada amanecer
la forma nueva de les tos idees
eses que nun duldes nunca compartir
na allegría de dalguna discusión
que ye la discusión allegría de idees tresformándose
n'equívocu que va semar nueves idees

y afítate qu'enantes dixi atopáu
onde tantos diríamos perdíu
perdíos ente la borrina de los nuesos mieos
toos esos que nos frenen
y emburrien a los cuartones de la cultura

y él
dicía
atopáu
y l'enerxía que nun sabe de fronteres
cruciando galaxes ya infinitos
hasta atopanos siempre
lloñe de les corrolades allumaes
por toos esos mierdos que se creen cimeros
y nun son más que cuchu
en procesu permanente de descomposición

y siempre
dicía
atopanos
en nós

No hay comentarios:

Publicar un comentario