viernes, 17 de octubre de 2014

LLINGÜÍSTICA EMOCIONAL

Nel llugar onde vivo
la xente nun usa anglicismos
y too
too
ta amestao
(quién nun va a la gueta
nun xinta castañeta)
y ye raru que dos digamos
la mesma pallabra igual
que perquí hai quién recoye la pación
y quién la atropa o atropia
depues de segar
(cielu cuarteao
dos días y moyao)
y siendo sinceru
allégrame vivir nún llugar
onde lo que ye prestosu
ye prestosu y non cool
onde los neños lleven aparatu
y pónense les neñes malles
y naide
naide n'absolutu
diz ok
cuando lo que val
val
ensin tantes babayaes
nin tantes moderneces
insustanciales.

Nel llugar onde vivo
les entrugues tien siempre respuesta
y nun entrugamos nunca per entrugar
qué tal ye qué tal
sía bien por lo que sía
sía mal cola so respuesta
(en san martín el ayo al güertín)
que los convencionalismos pa los ascensores
y l'apoyu mutuo ye'l apoyu mutuo
ensin tanta teoría
nin tanta babayá
nin más importancia que'l agora.

Nel llugar onde vivo
toos tenemos muncho que deprender
de toos
los que vivimos
nún llugar que va tiempu nun conocía
y güei
agora
mesmu

puedo llamar mio llugar
que yá me nombren manín
neñu

y nun digo anglicismos
y too lo amesto
ensin tanta babayá
nin...

(en san xuán el ayo al desván)

No hay comentarios:

Publicar un comentario