lunes, 20 de octubre de 2014

GUETA BALEÁ

Hai que dir a la gueta
si ye que ye domingu pola mañana
y el sol relluma allá lloñe
onde sía que rellume'l sol
y equí mientres eslluma
y dicimos que ye domingu
y que ye pola mañana
y que nun hai que dir a trabayar
y dicimos tamién que ye Ochobre
aunque'l sol rellume
y el vientu del sur ase les castañes
ensin salir siquiera del oriciu
ensin cayer siquiera a tierra
y toi metiéndome nún matu
y nun tengo vara nenguna ente les manes
p'apartar los hartos
que dicía que dicimos
porque dicimos y dicimos
los humanos
ensin parar
y por dicir
babayaes
como domingu
Ochobre
trabayar
y pola mañana
que bien podríamos dicir
si nun quisiéramos dicir tantu
nin fuéramos tan babayos
qu'hai que dir a la gueta
si ye que ye cualquier día
etcétera
pero claro
dicimos domingu
y Ochobre
y lladren munchos perros lloñe
y cerca
y el valle enbolubra los soníos
y pim pam pum
yá nun sabes per onde vienen
nin los perros
nin los tiros
que ta too enllenu señoritos
con chalecos reflectantes
y gorres bien ridícules
y suxeten escopetes
!escopetes!
esperando que-yos pongan delantre cualquier animal
p'asesina-y a sangre frío
y faese una semeya macabra
pa bazcuyar colos sos collacios
si ye que inda nun-yos mataron
al confundilos con un xabalín
o un corzu al señorito cornudu
acabando cola so desgracia
el bien mierdu...

!Mierda!
!Pim!
!Pam!
!PuM!
!Guau!
creo que voi meyor pa casa
hasta que sía llunes
o aprenda a matar
que hai que dir a la gueta
(dicimos
y dicimos)
con escopeta.

No hay comentarios:

Publicar un comentario