martes, 21 de enero de 2014

ONÍRICA 3

Sobrevuelo nel llombu d'un esperteyu.

Ente'l fumu de les chimenees xigantes
glayen los aparatos la so mecanicidad,
son soníos repetitivos
asesinos en serie de la sorpresa
qu'españen les nales del mio collaciu
estrapalláu poles ruedes de mil coches
atrapaos na autopista.

Envolúbranos fueu arcoiris
nel prau que llinda cola casa,
envolúbranos y nun nos quema
mientres m'emburria muncha xente desconocío
hacia la cueva de les garrapates
sentaes en tolos sofás de toles cases que conocí.

Los aparatos glayen entá
la so vida imposible.

No hay comentarios:

Publicar un comentario